ياعظيمه...موجهه للمعلمه

ابتدي بسم الله اللي مُنزل الذكر الحكيم
فيه رحمه وفيه نور وفيه ذكرى للبشَر

مُحيي عظام الخلايق بعد ماكانت رميم
ومُخرجٍ من ارض صلبه اجمل الوان الزهَر

ثم اصلي عالنبي اللي نشا أمي يتيم
واصبح ابتفضيل ربي عالم وعلمه انتصَر

ثم ودي ياكرام القوم في الصرح العظيم
تسمعون عجاب قولٍ سقتها بيدي مهَر

وش نقول اب ام حامل وهي ف الواقع عقيم
واعطت احساس ومشاعر وانجبت جيل ازدهَر

وش نقول ابنخلةٍ تاقف ويصلاها الحميم
صابره ماتنحني وتنتج لنا طيب الثمَر

شفتو لا مرت سحابه تحمل الخير ونعيم
هذي تشبه فاضله غيث العلم منها انهمَر

هذي تشبه صادقه ماهمّها صِيت الزعيم
همها تغرس تميّز جيل ف الامه ندَر

حقها كلمة شكر ومعطره ابريح النسيم
لن ما فينا مكابر للعطايا قد نكَر

ياكريمه ياعظيمه فاضله وفكرك حكيم
ياما بسلوبك ولدتي علم بالجهل اندثَر

انتي اول من سقيتي عقلنا بعلمٍ سليم
انتي كنتي في دجى التعليم للامه بصَر

انتي شمعه تحترق وتنور ادروب الفهيم
وانتي ذاك النهر يللي بالعطا جاد وغمَر

يوم ساد الجهل فينا والحرث اصبح صريم
من رياح الغرب يللي سوسها عاث ونخَر

ويوم كان الفكر مظلم يشبه الليل العتيم
وكان فينا الظلم رائٍ من هل الحكمه صدَر

جيتي ف اليمنى ثوابت تنصر الصوت الهزيم
وتحمل اليسرى محاسن من حفظها ماخسَر

جيتي ابصوت الإراده والعزيمه في الصميم
تكسري قيد الطموح اللي بجوفه انحصَر

كنتي طب اللي يعاني من هل العقل السقيم
كم كسيتينا خصالٍ يوم حاضرنا انحدَر

ياعظيمه ياحليمه جات ف القول القديم
الله ما يشكر فلانٍ للخلايق ما شكَر

كل ماقلت ابقصيدي لو كتبته ف الرقيم
مايساوي جهد ساعه فضلها بان وظهَر

اقبلي كل التحايا ساقها غيمٍ وديم
من شغاف القلب جاتك حيث مالحب استقَر