عنتر وسيفه

اللي زعل يزعل ويرضى بكيفه
من فضل ربي ماحصل مني قصور

آقف مواقيف الرجال الشريفه
اللي لهم منهج وموقف ودستور

واكافح صدوف الزمان المخيفه
واحسب حساب النقص والعيب والزور

ونفسي عن علوم المقرد عفيفه
يوم الفتى ماهو على الشر مجبور

واهل الوفا واهل النفوس النظيفه
اللي تزيد النور نورن على نور

احبهم حب الوليف ال وليفه
ماهو بحب" ياخذ ايام ويبور

واللي على اطرف شي تقذف قذيفه
ماهي كفو للشور يامدور الشور

تترك مراقيب الجبال المنيفه
وترجع تعيد السور وتخرب السور

ياكثرهم قوم العقول الخفيفه
لقيتهم مابين حاقد ومقهور

حطو لهم غير الوظايف وظيفه
وظيفتن من بينهم جالها دور

وطبع الضعافه بالنفوس الضعيفه
اللي مداها بين الاضلاع محصور

واللي زعل من شان عنتر وسيفه
طيرن على صوت الخفافيش مطيور

ماتنشر الاخبار غير الصحيفه
والا كلام الناس ماهو بمنشور

مير استريحوا جنب وادي حنيفه
تراه من عقب المطر صار مشهور