غياب الرفاقه

لـ صالح العبدالله، ، في غير مُحدد، آخر تحديث

غياب الرفاقه - صالح العبدالله

طافح كيل الغياب ولابقى في الصدر طاقه
والصبر ماعاد به صبر على فرقى الحبايب
 
هو صحيح ان الزمن ماعاد في وجه لباقه
وألا وجه الحب اصبح في علاقاته غرايب
 
الغريب ان الغلى والشوق لازاد احتراقه
يعطي المخلوق قدره تختزن وسط النحايب
 
ياحروف الشعر تجمعني معك حلو العلاقه
حلمي الواعد معك يجتاحني غيم وسحايب
 
ماملكت من الزمان الا علاقات الصداقه
وماعرفت الا المحبه بين خلان وقرايب
 
ويوم زاد الشوق جيتك شايل بسمك بطاقه
فوقها مكتوب ياحروف الشعر من هو السبايب
 
دارت الأيام فينا والزمن حط انزلاقه
وابتدا جرح الغياب وصار وسط الصدر نايب
 
ساقت الذكرى ليالي العمر وايام الرفاقه
رجعت ماضي الليالي والزمن فيه العجايب
 
ساقت الذكرى حروفي وابتدى جو الرواقه
وراح فكري يكتب الابيات مايشكي صعايب
 
يذكر ايام المحبه من اول ايام انطلاقه
لين ماحل الفراق اللي ترك روحي لهايب
 
قلت ياحرف الشعر من منطلق حبي وافاقه
خل نفتح بيني وبينك سواليف وطلايب
 
القلوب اللي نبيها من تسبب في فراقه
جاوب اللي كل ضلوعه بعد فرقاهم عطايب
 
اسالك بالله شف قلبي ترى زاد اشتياقه
والالم في صمتك الدايم يسبب لي مصايب
 
قال مافي الوقت شي يعجبك حلو مذاقه
لو شكيت البعد ولا عشت من فرقاه ذايب
 
قلت ليه تزيد جرحي ليه ماتحكي بشفاقه
وانت ياحرفي كريم وفي احاسيسك وهايب
 
كل داء وله دواء الا مجاراة الحماقه
مالها طب يداويها وجاك العلم صايب
 
قال مايكفي جريح القلب لو عاش اللياقه
والجريح من البشر معذور مايقوى الركايب
 
قلت اجل هذا خطاي اني تماديت بطلاقه
لين ماصرت اكثر انسان عن الاحباب غايب
 
قال اعقلها وخذ مني علوم لك دقاقه
غير رب البيت لاترجي ولاتشكي ذهايب
 
قلت ياحرفي ترى زودت في قلبي انشقاقه
وانقسم قلبي من احساسك ووزعته نهايب
 
يعني مع نفسي تبيني مااتعدى عن نطاقه
وكل شي وسط صدري اكتمه واقول تايب
 
قال خل الشعر لاتكتب ترى الاشعار ضاقه
مايفيد الشعر مثلك لو كتب احلى الكتايب
 
قلت ابقدم لهم عذري ومع الاعذار باقه
والسموحه من جميع احباب قلبي والحبايب
 
والشعر يبقى خويي لو يغيبون الرفاقه
لين فوق القبر ياحرفي يحطون النصايب
© 2024 - موقع الشعر