الكرامه

كنت أعشقك وأفرح بشوفك ولقياك
وكنت أنتظر طيفك بلهفة عجيبه

وكنت انتظرنور البدر من محياك
يعكس ملامح صورتك يا حبيبه

لكن حذاري لا تمادى في طغياك
لا صار هرجك مهزلة ما تعيبه

عند الكرامة لا تظن باترجاك
ماعاد لك باقي من الحب سريبه

انا كما حر ٍتعلا و تعداك
يجيب صيده لو تعلا يجيبه

ماانحني .. لا و اللي.. بالطين سواك
لا بارك الله في حياةٍ عطيبه

تقسى و ترضى وترجع تقول اهواك
ان ما رحمت القلب ويش تبي به

ماني من اللي قوته ضاع باجفاك
ولا ني ضعيف الباس حبك يصيبه

ولا تنتظر دمع البكا لاجل فرقاك
نفسي عزيزة وبالكرامة زهي به