رسالة من البلوريتارية المصرية - محمد شويطر

طول عمرى طافح الكوته ودهرى فيكى محنى
اللقمه فيكى بالعذاب والجوع بيدبحنى
ساهر مع الليالى بحلم بشمس جديد
بس منين اجيب شمس والشعب جارحنى
جرحنى لما قولت أثور طلب منى سكوتى
وانا من كتر همى اصبح سكوتى موتى
وانا فاض بيا الحمول و مش ناوى السكوت
مش ناوى اسيب ابنى يموت
وابن ابنى يموت
يموت مالعار,,, يموت مالهم
يشوف اجداده طافحه الدم
و يكبر لجل وطن اصبح
همه كله فى الرقاد والسكوت
مش هموت
هرفع راسى وهصرخ
الأرض أرضى و زرعت فيها العلم
والعلم علمى دمى لون احمر
والاسود سنين وسنين
والنسر خلانى حزين
والابيض كفن الشهيد
اللى مات لجل الحلم الوليد ,,,مايطول
سما الوطن
ايه الشجن ؟!!
الشجن كلمة بسيطه فى بحر مصر
لقمه مش ف ايد عامل
وطبخة ف قلب قصر
جرح أم مات ابنها
صلوا عليه رفاقه العصر
احكيلك ايه ولا أيه
شوفلى وطن شاورلى عليه
اتكلم مع عالم بتفهم
الحرية فى بلادى كفر
الزاد كفر
الحب كفر
والله الكفر ان انت اللى تكفرنى
وربى عالم بحالى رحيم ومقدرنى
خايف ليه من صرختى
لما بتقول انك كبير
ولا عشان معشتش محنتى
خوفت اخد مكانتى اللى بعدت عنى كتير
خفت من خطرى عليك يوم التغيير
اليوم دا جاى جاى مهما ططال الزمان
هقول لابن لا ييأس ولا يسلم للأحزان
زمن وطنى زمن اخوان
هعلمه ان كله جبان
طالما ما فيها العدل
هقولوا يعيش رافع راسه
ولا يرضى يوم بالذل
انت يا ولدى الأمل
انت القوى وهم الضعف
انت الحق وهم الباطل
فى زيك الف عامل
مستنى إشارة النصر
ولا ترضى بصفقه ولا ترضى بخيانه
اعمل اللى بدك بس حاسب
كرامتك وبلدك أمانه !!
© 2024 - موقع الشعر