قصدت باب الكريم ومكه وطيبه - رشيد الخليفه

عسى هواجيس فكري ما تخلوا بي
وتفجر الصدر لا منه عوا ذيبه

عشرين عام هذا نهجي وذا دابي
هواجس الفكر تقبل به وتقفيبه

يازيد ركب المحبه خالف اركابي
وبنات الا يام مدري ويش تنويبه

كلي خطايا ولا دري وين يرمابي
والاجل ما ينعرف بعده وتقريبه

اخاف يوم الحساب ونشرة اكتابي
وما خط باللوح ما تمحا مكاتيبه

في ما مضا الود سوابي وسوابي
ذوقني المر لين ادما مخاليبه

وادميت من مقتله يا زيد مخلابي
واليوم ما عاد تغريني مراقيبه

لا عل رجم الغرام النايف النابي
تنعاق رجلي ليا حاولت اعديبه

اللي تشقويت به لا عاد يشقابي
يرتاح لا عاد يرسل لي مناديبه

ما عاد لي شف في تلعات الارقابي
تايب وعد الهوى خبثت مشاريبه

جنبت عن ورد ماه وخاطري طابي
وقصدت باب الكريم ومكه وطيبه

اخر طموحاتي الخلوه بمحرابي
واللي دعى للهدى يوم اذن اجيبه

© 2024 - موقع الشعر