الــبــرتــقــالــه ... !!!

كل ما واجهت واحد .. وأسأله وشلون حاله
قال لي ياخوك تكفا لا تقوووول شلون حالي !!!!

قلت قولوا شاللي صاير ... قالوا شوف (( البرتقاله ))
أم الأصفر وأم الأزرق ... والحلا بالبرتقالي

من كثر ماقالوا عنها ... ومدحوا زين الغزاله
رحت أشوف اللي مدحوها ورفعوها بالعلالي

شفتها واللي لقيته شي مانقوى احتمال
شفت غزلان ٍ تراكض من يمين ومن شمالي

استثارتني وزادت في سما شعري خياله
ذكرتني بالهوى واللي حصل في مامضالي

هيضتني (( البرتقاله )) .. قلبي مدري وش جراله
الأكيد اللي حصلّي شي ماهو باحتمالي

يا زماني لو تعود وتفتح لقلبي مجاله
وترجع أحلى أيام عمري واللي راحت من ليالي

كان صححت الخطايا والهوى مالي وماله
كان ما خليت قلبي يفتح لهمّي مجالي

والا ماخليت خلّي يزعل ويقطع وصاله
لكن اني من غروري كنت سبّة ماجرالي

لو نظرتوا زين خلّي لو هي لمحه من جماله
تعذروني يوم أقول إن غير حبه ماهنالي

لا بغيت أوصف وصوفه صعب أوصّفها اخصاله
يعجز لساني ويقصر لا بغيت أوصف خيالي

لا ذكرت اني خسرته .. زاد في قلبي اشتعاله
ضاقت الدنيا علي ّ وضاق من فرقاه بالي

صدقوني انه أحلى من بنات (( البرتقاله ))
ولا ذكرت اني خسرته تصفق اليمنا شمالي