أربع عليّه ربعن عذبني

الضيق والغربال والبعد والتيه
أربع عليّه ربعن عذبنّي

صكّن عليّه بالعتب والمشاريه
الله يستر كانهن ماذبحنّي

حظي بلاني بلوتن في بلاويه
من وين ما أمشي به همومه بلنّي

كل مابغيت أسلى مع الناس وأسليه
جتني همومه بالخفا حوطنّي

ومن فوقها جرحاً عن الناس مخفيه
بعد الحبيب اللي فراقه طعنّي

وين أنت ياللي يطرب القلب طاريه
وين أنت مبعد ياهواء البال عنّي

ماعاد بي حيلٍ على البعد ياهيه
لاتصير معهم يالغلا ممتحنّي

ألحق عليّه واسمع القلب وشفيه
وعالج جروحاً من جفاك جرحنّي

أنت الوحيد اللي من الناس نغليه
وأنت الوحيد اللي سهومه رمنّي

وأنت الدواء للضيق والبعد والتيه
وأنت الفرح والضحك وأنت التمنّي