جرحً قديم

لـ رياض العشيشان، ، في غير مُحدد، 1،950، آخر تحديث

جرحً قديم - رياض العشيشان

دك الخفوق الهم والهاجس اجتاح
جرح(ن) قديم(ن) في حياتي تجدد

ماني بخاين لا ولاني بمزاح
والرزق للمخلوق ماهو محدد

دخلت باب(ن) للعنا مابه افراح
وشفت الوفاء مطروح ثوبه مقدد

وشفت الظلام اللي كسا ثوب سفاح
ذاك الحسود اللي علينا تودد

طلعت كلي هم من باب الاشباح
والمشهد اللي شفت فيني تعدد

اقفيت وبظهري سكاكين وارماح
حاولت اداوي بس منهو يسدد

فاتورة التذكار يوم الوفاء صاح
على زمان(ن) كان حمله مشدد

ابنشدك ياصاح وين الذي راح
ليه الغلا بالبعد دايم مهدد

ابنشدك لو قيل ذاك الحطب طاح
بينك وبين اللي بوجهه تصدد

جمر الخفوق ان شب وشلون ينزاح
مدام ناره في عروقي تمدد

ودي عقب هالجرح احيا وارتاح
من عاذل(ن) بالحسد دايم يلدد

فيني شموخ(ن) بالعنا مابعد باح
وفي داخلي نزف المشاعر يردد

يالله انا طالبك تشفي هالاجراح
اللي سببها حلم كان وتبدد

© 2024 - موقع الشعر