نـــــــوف

الله من قلب(ن) مولع وملهوف
صابر على جور الزمان وصروفه

بين الأمل وليأس والسمع والشوف
والحظ ولا حظ طول وقوفه

ولحل والترحال ولأمن ولخوف
اعزف على أوتار الحياة امعزوفه

يالعنبو حظ(ن) حداني على نوف
ويازين حظه من غدت نوف نوفه

عن وصلكم يابنت حدتني اظروف
وعزي لمن مثلي تحده ظروفه

وماحدني خشيه من ارماح وسيوف
والمال من قله وكثرة الوفه

ماحدني غير أني انسان معروف
أفخر بربعي ورجال امعروفه

اهل الوفاء الي فيهم الطيب مألوف
وكرم من الله شرفه في ضيوفه

لولا اختلاف اسلوم وطبوع ووصوف
مايأخذك غيري وعيني تشوفه

هذي النهايه قلتها منك مكسوف
ومن غيره الله مكتمل في وصوفه

تبقى لكم ذكرى معي داخل الجوف
وتزورني في كل لحظه طيوفه

يانوف هذا العذر ولعب مكشوف
(ماهو بعذر الي يفرك كفوفه!)

صغت أعتذاري لك بكلمات وحروف
وارجوك قولي ماعليكم حسوفه!!