مع نسانيس البراد وسكرة الليل السكون
حرّك الخافي سوايا مالها شكل ومثال
من سببها زادت الحسره .. وزاد ابها الغبون
شي اكبر من بيوت الشعر وحروف المقال
ماهي بطربه وانا اسوق القوافي واللحون
ولا رفعت الصوت من شان الهنوف ام الخصال
انفطر قلب المسمّي وانتثر دمع العيون
( وين احفاد الصحابه ؟ وين ابطال الرجال ؟ )
شي واضح ما يبي يمكن ويمكن بالظنون
افهموا يا هل العقيده واسمعوا هذا السؤال
( يا مدورة السلام اللي تبونه وش تبون ؟)
دام قول الله يدنّس في سجون الاحتلال
وين راحت غيرة ( الفاروق ) والغيره تكون
في نهار ٍ مثل هذا مابها شك وجدال
في حنايا كل مسلم ضيق والحيله تخون
يعلم الله مابقى فينا صبر ولاّ احتمال
ديني الاسلام والله حافظه رب المزون
ما يهزه قول حاقد باي حاله واي حال
ودون دستوري اباقف لو تقطعني طعون
معتدي همه يزول الدين والعالم تزال
يصنع سلاحه ودون الشعب يني له حصون
ويرسم الخطه وهمه كيف تحقيق المحال
زاد طغيانه علينا والبلا زاد الجنون
وسط كابل والعراق النار قبت بشتعال
يوم اكثرنا متيّم في هوى الطرف الحنون
ويوم اكثرنا متابع سوق الاسهم والريال
ويوم اكثرنا تربّى بالشوارع والسجون
ويوم فرطنا بدين الله جانا ذا النكال
سلّط الله ( بوش ) وجنوده علينا الكافرون
واصبح المسلم ذليل ٍ فالجنوب وفالشمال
يا شباب الامه اللي فالمراقص ترقصون
من سببكم عاشت الامه بوضع الابتذال
بالمعاصي تسهرون وبالاغاني تطربون
والنتيجه سطوة الكافر علينا لا تزال
انصروا رب ٍ تعلّى في علوه تنصرون
قول ربي في كتابه قول يلزْمه امتثال
طالبك يالله اللي بامرك الكاين يكون
تنصر الدين وتذل المعتدي يا ذا الجلال

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين