ودّي أضمّك

ودّي أضمك شوق والشوق يجري
في عالمي يجري من الغرب للشرق

في غيبتك وضعي من الشوق مزري
أنشهد إنه حارقٍ داخلي حرق

في واحد محرّم من العام هجري
يوم الغيوم تهل ويقدح بها برق

قمت أتذكر شي ماكان يطري
يوم إنتلاقا واللقا صايرٍ سرق

لا جيت أقوم وهمستك لي ( بدري )
أقول خايف يالغلا قاطع الطرق

ومن القهر أفرك يميني بصدري
وأنتي عيونك دمعها غاديٍ غرق

أدري ولكن ليت هالناس تدري
إنّي أجر الصوت لا ناحة الورق

هذا لقانا شوق ووداع ..جبري
وأصبحت (عايش .. ميتٍ) مابها فرق

قبري أشوفه بس ياوين قبري
هو في حدود بقيق ولا مع الشرق