واشيب عيني - سلمان الوهيف الرويلي

واشيب عيني شيب من طاح مهموم!!
على فراق أغلى البشر في حياته

امه وأبوه اللي على الطيب معلوم
الموت جاهم واتركوله وصاته

خمسة خوات..ومابها شك ملزوم
يحفظ وصية والده في وفاته

توّه صغير.. ومابقى عنده عزوم
لاقام طاح!! وينتخن به خواته

ماله عويناً في حياته ومحروم
لو أشتكى محدٍ سمع في شكاته

حالي مثل حاله.. على الهم مفطوم
والضيق دايم في خفوقي مباته

على وليفاً تارك القلب مقسوم
قسماً معه واللي يعيش برجاته

له مدتاً غايب بلاحس وعلوم
واشيب عيني..كان طوّل سكاته

أتلا العهد حرفي على الكف مرسوم!!
وأسمي مطرّز في طرف من عباته

ويش السبب في صدته!!صحت مضيوم
وشلون يبخل صاحبي بالتفاته؟؟

ليته يشوف بغيبته كيف مهموم
ليته يشوف اللي حصل من سواته

والله مايقطع وصاله ولايوم
ويشري وصالي لو دفع به حياته

© 2024 - موقع الشعر