هيبته رمز الفخامه

راكب اللي هيبته رمز الفخامه
مركب التجار واصحاب الجلاله

الشريطي ماوقف عنده وسامه
موقفه معروف في صالة وكاله

جيب لكزس مطمع الرجل وغرامه
ماملكه ابن الفقير ولاطراله

لامشا يعطيك موجز للسلامه
مصممن للخط لو طالت حباله

فالخطوط العسر ماتلقي الندامه
انسيابي مايهمه ماجراله

لا وقف كنه يشرف من عدامه
قلت كل الناس تحته في ظلاله

وان نطحته قلت هذا له زعامه
ياملك والا اميرٍ من سلاله

وان قفيته فارسٍ يكرب حزامه
فوق خيلٍ تنعرف اصل واصاله

ولاعترض بنتٍ تغطت باللثامه
من جمال الله كساها زين فاله

وان وصفنا داخله قصر اليمامه
مايصدق كود من شافه وجاله

فيه شاشاتٍ توضح لك سهامه
بالاشاره والتنبه في حواله

والمراتب كنًها ريش النعامه
لونها يعطيك شكلٍ من جماله

لون بديٍه سكري فيها دهامه
لمعة المنظر تثبتلك كماله

سايقه من هو امين فاستلامه
في مهمه ما يضيع لي رساله

نصه اللي وافين قدر ومقامه
فايز اللي كل طيبٍ من خصاله

شاعرٍ له فالشعر بصمه وشامه
يعسف القيفان في وضع الجزاله

لانصيته يبتديكم بالكرامه
الشحم والعود الازرق من حلاله

بعدها تقريه مكتوبي امامه
وفي جوابه نبتديهم في سؤاله

الهواي ذا الزمان الكل لامه
صارو العشاق في حكم الازاله

صاحبك ذا اليوم ملوين خطامه
بالهنوف اللي يحل القلب حاله

اشهد ان الحب حلوٍ من كلامه
لا حضر قام يتغنج في دلاله

فرقو من بيننا حتى سلامه
مايجيني قاطعٍ فينا وصاله

ماخذ طبع التكبر في نظامه
اخلفوه اهل الحسد واهل الجهاله

راح يومي من فراقه في صيامه
والسهر طوى عيوني في لياله

لو نعيد الشعر من وقته وعامه
مايكفي فالوليف ولامداله