راضني زعلان - فهد الديحاني

راضني زعلان من سبة خطاك
ودي ارضى بس ما راضيتني

انتظر عذرك وآبين لك غلاك
وآ تفاجأ كل ماخليتني !

يعني ما تقدر تعذّر ياملاك !
زين ابسأل ؟ دام ماواسيتني

كيف تقدر تحبس العذر بشفاك
والبلى إنك وقتها ضميتني !

ودي اسمع منك قبل اجلس معاك
انت جارحني ولا داويتني !

وكيف تتركني على درب الهلاك
ينقتل صبري ولا عزيتني !

انتظر من حاجتي تمطر سماك
جفت ارضي وانت ما بليتني

كيف لو تعلن عن الغالي جفاك
هذا حالي وانت ماجافيتني

ما اشكك في غلاك وفي وفاك
كثر ماحبك انا .. حبيتني

وما ابي غيرك ولا اعشق سواك
عن سواك أصلاً تراك أعميتني

بس أبين لك قليلاً من غلاك
والوفا اللي به عمر خاويتني

اسمك بقلبي وقدرك ماخفاك
واسمي ( حبك ) وانت من سميتني

تكبر بعمرك ويكثر بك حلاك
ويكبر بعيني غلاً اغليتني

كن ربي بأجمل إبداعه كساك
اذكر الله كل ما مريتني

ما قدرت اوصف جمالك يا بهاك
شعري يتعذرك لو اغريتني

ودام شعري بالغلا جاك وداعاك
اعتذر له بالحكي لاجيتني

انا لو اخطي اجيك اطلب رضاك
وأنت تخطي ليه ماراضيتني

فهد بن صنهات الديحاني
© 2024 - موقع الشعر