ياخلف ايامنا وشهورنا والسنين
قست علينا وحنا ماقسينا بها
يجرني يابن عمي ذكرها والحنين
جر الرشاء باالمحالحه يوم يسنابها
بس اتذكر واقول الله عليها يعين
وين الوناسات والديره وشيابها
وين انت يااللي تشيد في هذاك البطين
وين المعاميل والشبه وشبابها
وين انت يالمجلس اللي فيك هرج ثمين
والسالفه باالمغازي لافتح بابها
وين انت يااللي تحسب الوسم للمسلمين
عنده احساب السنه ماضاع بحسابها
ياخلف شفت الشديد وينهم راحلين
البدو مروك باالغبشه على اركابها
عقب البداوه يابن عمي اسوات السجين
بس السوالف باالاسهم لاحكينابها
بين المكيرش سوالف جيلناواللجين
هذاك جاب الوصاه وذاك ماجابها
وتقول شعرك علامه يابوماجد حزين
واقول هاذي تراها جملة اسبابها
انا بلايه يابن خشمان في كلمتين
يوم البداوه جرت باالدم رحنابها
الله واكبر على الايام ياالطيبين
لاحداً يلوم ابو ماجد يوم غنابها
ولاسب راع المدينه مار شبحي يمين
الوقت خلا الاوادم تفقد اعصابها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين