يالمدمن اللي بعت عمرك بدنياك
العمر واحد والسنين محسوبه
لعبك الشيطان والصاحب اغواك
وخلوك وسط الناس مثل الجلوبه
ضيعت دينك يوم واصلت بلواك
وخليت عمرك يكتسي من ذنوبه
الله عطاك العقل ميزه للادراك
والله جعل للعبد بالذنب توبه
وامك وش لي ذنبها اللي تمناك
ترعاك طفل ونومها به صعوبه
ربتك تبي تالي العمر تلقاك
لان الدهر لامال تكثر عيوبه
تبي تذرابك عن الذل بحماك
وتبي مع الجيران دوم محبوبه
وابوك يومه يتعب النفس لرضاك
يشري لك البسمه ولو باع ثوبه
ياما سهر طول الليالي وعشاك
وياما تغرب بالشمال وجنوبه
حتى خياله لادبح الليل يرعاك
لو كان شرق الدار وانت بغروبه
واليوم بان الشيب والعود ولاك
يبيك تقصر عنوته في دروبه
وصاك في دينك وبالطيب وصاك
ويبي الهنا مثل العرب لاهتنوبه
واخوك يومنه على الطيب ينخاك
يبيك عزوه لانخوك ونخوبه
وختك تبيك لسترهاعن هذولاك
من خوف يلحقها من الوقت كوبه
ولدك لاقابلك صبح ومساك
يقول بسمي شف ابويه دعوبه
ويبي الدلع لوكان ماجيتله جاك
يبي حنان وعطفهم لاعتنوبه
والزوجه اللي ماتحسب خطياك
تترك لك الغلطه وكبر العقوبه
وطولت بالغيبه وكلن تحراك
وقلوبهم للباب وعيون صوبه
وقالوا سجين وصاحت الام لاباك
قال اسكتي خطرن على القلب نوبه
قام وتحيزم عقب ماذاق فرقاك
يبي ستر بيتن غدت فيه هوبه
ولدك وسط السجن زارك وبكاك
وصارت به العقده ثمانين نوبه
هذي حقيقه بالمخدر ومدراك
حشيش والهروين ولاحبوبه
سمِ يهودي بين الاسلام فتاك
يومن بالميدان فشلت حروبه
وحذر قبل لاطيح حذراك حذراك
نفسك عزيزه لاتصيرمغلوبه
الشاعر غازي الرويعي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين