1 ياماجد اركب جعل بالامر خيره
ابيك لاسافرت تركب على يمين
2عقب العشاء والركعتين الاخيره
وختمتها بالوتر عقب المصلين
3 لامن خلي البال قام لسريره
لاراح ثلث وباقي الليل ثلثين
4لاصار توه قايمن من فطيره
راس ادرعا ماشيبوه البعيدين
5ماشاقه الماطور لاشد قيره
ولاذكره مكنون صوت الشكامين
6ولاتله الغربي وبعد العشيره
اللي عن ربوعه تغرب له اسنين
7ولاوقفه مجرى الشعيب وهديره
ولاقام يمشي من شعيب لشعيبين
8ولاراح بالوايت وروى غديره
ولاعجله شوف الغنم والبعارين
9ولاراح عساس وشاف البذيره
ولاقال جعلك يام سالم تغنين
10ولاجاء البيوت الشامخات النظيره
ماتسمع الاياهلا فيه واهلين
11ولاهيضه قاف الحويفي بطيره
ولاابن زويبن لابغى دار غالين
12ابوك ياماجد عطاك السريره
وابيك ياماجد تجيلي على الدين
13 اركب على جيب يسرك مسيره
من فضل ربي ماخذيته من الدين
14مارتاح بالي لين يضرب نبيره
ويزعل عليه دون ميه وستين
15حقه عليه لين تسمع صفيره
صفير غصن من هبوب الخماسين
16 ابيه لامني نويت الزبيره
لادق هاجوس يفك الشرايين
17 والقلب جابه من عنا الوقت حيره
والبال متكدر يجيله نهارين
18الوقت يرعى القلب رعي السعيره
ولوعها العرفج وهبوبها شين
19والهم لوهو زاد مابه معيره
دارت بنا الدنيا وصرنا بعيدين
20ورحنا مع الايام في كل ديره
مانجتمع كل السنه بس عيدين
21ايامنا واحداثها المستثيره
والله يثبتنا على الماقف الزين
22حنا نهديها وهي مستطيره
ودارت ولازلنا على السلم باقين
23ومن خلقت الدنيا وهي مستديره
بس الرجال رجال مبطي وبعدين
24مايشرح الخاطر ويبهج نظيره
الاوقوفي عند ربعا مسمين
25 الفي على اللي ماتكدر قصيره
محبوب للاجناب والربع الادنين
26 النعم حاشه باليال العسيره
يوم المراجل ماتجي مثل هالحين
27 عساء حياته بالهنا والستيره
يحميه من نزل تبارك وياسين
28والله من سو الليالي يجيره
ياناصر الاسلام في غزوة حنين
29 ومدحت ابوي وفيه غيره وغيره
ربعا ينومس ذكرهم بالدواوين
30 ولاهمني راع العلوم الصغيره
يزعم بنفسه عند ناس ضعيفين
31والراس يطبخ من امورن كثيره
لاهي بلاوحده ولاهي بثنتين
32 وهجوس غازي كل يومن مغيره
وانا اتحدها على العسر واللين
33بس العقل يحدى الرجال الكبيره
وانا حداني يالرجال الحشيمين
34 ولاالهدف قدمي وعيني بصيره
لاشك للشرهات ناسن كثيرين
35 وياما سفهنا من وجيه حقيره
وياما تركنا طردها لبو وجهين
36 ابمدح الطيب ولابه معيره
والشعر مايكتب على شان قرشين
37 يكتب لمن مدحه وصل كل ديره
اللي يحصل باذكر قول نعمين
38 الشاعر دايم مايريح ضميره
حتى يتعدى بيت سبع وثلاثين
39 قلبي غدى كنه قناة الجزيره
بين العراق وبين مافي فلسطين
40 والعاقل اللي راكد بتعبيره
يقدم ولاينظر بهرج المساكين
41والنظره اللي ماتعود قصيره
اتخلي الرجال مثل السلاطين
42 لاصار به من واقع الوقت غيره
والشعر ترجح به جميع الموازين
43 يومن بالافكار ناس فقيره
انا احمد الله بالمعاني غنيين
44والشاعر مثل العود حرقه يثيره
ويبين نوع العود من حرق نارين
45 وهواي لاغصت البحور الغزيره
واخذت منها مايسر الشريفين
46 يومن كلن عدته عند بيره
حنا نوردها لعذب الفراتين
47ابوي سلمني حزام وذخيره
وانا علي اللي تصيب النياشين
48وانا الفخر عندي سيوف شطيره
اقلها اللي يقسم الراس قسمين
49ان جيت لمطارد بيوته شهيره
يدغم لك المعنى ويعطيك دربين
50ايتعب الشاعر ويتعب شويره
لاصار مايفكك رموز العناوين
51ومرضي يصخر شرد مستذيره
ينصت له السامع وتنظر له العين
52وان كان بالميدان ناس غفيره
بالملعبه ماهو على صف صفين
53وفيها منازل والمعاني خطيره
اثنين لاراحو ولاعادوا اثنين
54عبدالله كان السيف خلا جفيره
وعطالله اللي يدبل الصاع صاعين
55والشعر ماهو من خفير لخفيره
الناس يابن الناس ماهم مطيعين
56العلم واضح مثل شمس الظهيره
وعلم الخطاء يرجع على صاحبه دين
57ماهي علوم اللي سفر في بعيره
وخلا البعير وعود بخف لحنين
58وربعي مروضت الجموع الضريره
شعارهم ماهو بواحد ولاثنين
59تقلى جزايلهم على كل سيره
وتلقى مواقفهم بوسط الميادين
60والطيب ماوقف على ابن المغيره
ولاضاعت الخوه عقب خوة حسين
الشاعر غازي الرويعي الحربي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين