حلمي الكذاب

لـ مفلح نجم، ، في غير مُحدد، 789، آخر تحديث

حلمي الكذاب - مفلح نجم

ثلاث اسنين ياقلبي وانا واياك مثل اغراب
مغير نسولف لذكراه واعطوره مع اثيابه
ثلاث اسنين ياقلبي وانا في حلمي الكذاب
عجزت اصدق ان الموت حق وغصب نبلى به
عجزت اواجه الواقع وانا من عادتي ماهاب
ولاني من رجالٍ لادعاها الحق هيابه
ولكني معه ماعّرف عزوم ولااملك الاعصاب
مجرد مايجي طاريه اسوق الرّجل لترابه
واقَبِلّ كل ذرة رمل تستر هيكله بحساب
واضم القبر بضلوعي واشمه علّي احيا 00به
واسولف له عن الفرقى وعن حالي بعد ماغاب
وبعض احيان اقول بخير اداري حرقة اعصابه
واذكره الهدايا اللي بكى من صمتها الدوﻻب
وبعض اشعاري اللي كان يرسمها على كتابه
ولحظات انتظار بشوق من شرفته لين الباب
ياطول الوقت وعيونه توسل ينفتح بابه
شموعه تشتعل والنور خافت والهوى غلاب
ولحظات اللقا مثل الجمر والوضع متشابه
ومن ذكرى الى ذكرى واحسه منصت وبعجاب
ياجعلي فدوة انصاته وجعلي فدوة اعجابه
واحس ايدينه اتلامس يديني والشعر ينساب
على ذاك الحجاج اللي شكى من فزة اهدابه
واحس انه يناديني حبيبي كن فيك اعتاب
فديتك ضمني ضمة حبيبٍ فارق احبابه
اعَرّف انه مجرد وهم وانه حلمي الكذاب
مدام انه يسليني هلا بالحلم واكذابه
© 2024 - موقع الشعر