جرح الصديق

يالله يالي لامرك الخلق تنصاع
تمطر ويغسل كل قلبٍ(ن) بسيله

هذي ثلاث شهور والقلب ملتاع
اعدها في كل يوم(ن) وليله

امشي كبْر وادس جرحي بالاضلاع
جرح الخوي يبطي غزير(ن) مسيله

مره اقول انه على الدرب ثم ضاع
وارجع واقول انه بدربي دليله

ومره اقول انه زهدنا وبياع
وارجع واقوله انه رفيع(ن) سليله

ومره يجض القلب وافزع مرتاع
ابطى عسى ماذاق لوعه وميله

ابحث له الاعذار في كل الاوضاع
مثله قليل ونادر بكل جيله

مرت ثلاث شهور صابر وملتاع
والجرح في صدري غزير(ن) مسله