للحبيب طارق الحيب - سعيد القير

العاقل اللي للمهابيل لا غار
يسمع بقايطها ويرضي زعلها

يرفع مقامه عن قصيرين الاشبار
ويصيب مرامى بندقه لا حبلها

بينه و بين موضي العجر مقدار
ويساير اعقول الجهل في جهلها

ترى البجيح اللي مغازيه في الجار
يذبح له الحايل ويشحذ بدلها

ويش وانت لو نرفع عن اجدادك استار
مانتب لسان للعرب يا بغلها

دلتك لو جبنا تفاصيل الاخبار
عرفت نبذة جدك اللي جدلها

لو ان ابوك امسى ولا صار ما صار
ابرك ولا زاد المهابيل بلها

طبك مع اللي مايخليك تختار
اللي مثل شرواك يكوا ويلها

ونيت يا طارق من المطرق الحار
الي علباك علباك من كف دلها

يابو حبيب الله يحبب لك النار
ويشين حظك في حياتك واملها

حنا هل الرايات وعيال الاحرار
واهل الفعول اللي ينومس عملها

لنا مع التاريخ وقفه ومشوار
والرايه اللي جدنا ماخذلها

حنا ولانا للوطن شايبن بار
وجماله الحيين يرغي فحلها

ارواحنا دون الوطن درع وازرار
معروفنا باهل الولا ما جهلها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر