يا طير

ياطير وان شفت الجبال الشواهيق
خذْ لك على روس المراقيب لفة

ابيك تكفخ بالجناحين وتويق
على فراشٍ روضته مستضفة

على جبال النير خذْ لك تحاليق
واليا لقيت العلم ياطير وفة

عطني خبر هاك الرجوم السواحيق
اللي علاها لنسل الاحرار ضفة

هاك التلاع الدارسات المذاليق
الشارحات الضارسات المكفة

مدهال عيرات الوجيه المطاليق
قومٍ طنايا والشوارب مرفة

جعل السحاب اللي مزونه محاقيق
تبرق وترعد فوق هاك الأدفة

ياخذ مطرها قطعة ايام في سيق
والسيل خشم الضلع لاهاج حفة

ياتي نبأ الأرصاد فيها بتوثيق
علمٍ وكالات الخبر تستشفه

يا ماحلا سوق القدم حزة الضيق
وترك المدن وعيالها المستخفة

ومد النظر في حاجرٍ له زماليق
للنفس عن قاز المدينة تنفه

روضٍ خضر نبته له ايام ماذيق
ياخذ بها راع المغاتير شفه

سلوى الضمير وري عطش المعاليق
ومشفى العليل اللي وهومه تلفه

والبعد عن سود القلوب المحاريق
توابع أقزام العقول المجفة

ومنادمت خطلان الأيد العماليق
اللي لهم في قمة المجد صفة

مجلاسهم على الدلال الغرانيق
ومقامهم سيلٍ هدر مع مطفة

ولاخذت لي فنجال واحد على الريق
كني ملك عتق الأكابر بكفه

ياطير مأغبط كانزين الصناديق
هذا هوى بالي وسفه المسفه

هات الخبر ياطير ياابا المسابيق
والاّعلى هفّتك روح بمهفة!!