مدورة التكاسي

الرفيق اللي على الطالة شِراعه
وفي بحور الجود تلقى له مراسي

لا يضيمه همّ وانا في ذراعه
سيف في موقف سَعْه والاّ حماسي

رفقة الطيّب على سلم وقناعه
تاج تقدير الرجال وتاج ماسي

جعل سلمي لي عن المخطي مناعه
وجعل عرفي في قناعاتي قياسي

مايحط انقااط لحروف الطباعه
غير مَنْ راسه على الأيام قاسي

كَبرة الهوشة بليل بلا فِراعه
وصاحب الفانوس لا ذلحين ناسي

جمهرة شارع على صوت الاذاعه
وقّفت رحلة مدورة التكاسي

ياعيون الليل للنيرة ولاعه
اربعه عمال في ستة كراسي

حسبي الله يامروجة البضاعه
كرسي اداره ولا كرسي رياسي

قلب مايخشى الزمان وقلب راعه
لفّ موجاته على صوت الحساسي

ومنتج ابوقوس ابوه من الرضاعه
وداعم التوريد صايبه التماسي

يالله اعوذ ابك من قلب القطاعه
في مصافات الرفيق وحب ناسي

مايكدر خاطري غير المياعه
في وجيه رجال يتلفها النعاسي

ماهقيت ان الحياه من البشاعه
ولا هقيت ان الحروب بلا لباسي

أسرع من النار تقرير الاشاعه
وأكثر من ضيوفهم روس التباسي

ويامكبرة البيوت من الصناعه
الرباعي في معادلته خماسي

والمجاعه في وجيه اهل الزراعه
في صباخ الارض والا فالرواسي

كل محباسٍ على راسه قناعه
والحراره سببت للإحتباسي

وكل بيرٍ تاصل حبالي لقاعه
والمنايح دّرها يملا طياسي

ياعسى ماجلس طلب لوربع ساعه
عند قومٍ مالهم فالطيب ساسي

يالله انك لا تفرق لي جماعه
ويالله اني في رجاك من العكاسي

أحمني واجعل سنين العمر طاعه
وارزق أصحابي وربعي طيب راسي