مانيب راضي عنك

مانيب راضي عنْك بس لازم ارضيك *****لنّك دخلت ارض الخفوق وحكمْته
.
مشاعري في ظل حكمك مماليك *****تخضع غصب لو حقّها قد هضمته
.
حبّك سطى واجبرني اقول لبيك *****حتى على جرح بصدري وسمته
.
تغيب ... ماكني وقفت مْتحريك *****وان جيت ... ماتبني وصالٍ هدمته
.
تنام ... ناسي خلفك عْيون تبكيك *****صحيح ......... ليل البارح شلون نمته
.
ماعندك احساسٍ يهيّضك .. يحييك *****ولّا طعنته بالبرود وعدمته
.
كم لي وانا عن بوح الاحساس اداريك *****والشاعر اللي داخلي طال صمته
.
ماقلتلك حطّ السما بين اياديك *****وخلّ القمر ياتي الى من زهمته
.
ادنى الحنين ... يْردّك لْعين مغليك *****وادنى الحنان ... يعوض اللي حرمته
.
كذا .. ولو ماجابتك ذي ولاذيك *****الصبر هو حيلة محبٍّ ظلمته
.
امّا على النسيان .. مانيب ناسيك *****ماينّسي حبٍّ قديمٍ كتمته
.
حتى لو احاول بوعيي تناسيك *****لانمت باشوفك بحلمٍ حلمْته