حق الشماته ياسعد - بدر بتال

عزي لحالك يا حسين
لاصرت في هم ونكد

أنا بعد مثلك حزين
ناطر رجوع المبتعد

خسارتك فقر(ن) ودين
خسارتي ما تنحصد

أنا فقدت الغايبين
اللي خذوا نور البلد

قللي شرايك يا حسين
اسمع وخلك مستعد

الوصل هم العاشقين
والبرق يتلاه الرعد

هناك كنّا جالسين
وكان الوفا هم الولد

قالت أحبك من سنين
رديت:أنا أحبك بعد

أنتي ولا غيرك ثمين
أنتي ولا غيرك أحد

غيرك ملكته باليدين
لاقام عندي ولا قعد

وسمعتها هالجملتين
وبدت بظلمي تستبد

قالت: أببعد :قلت :وين
قالت بسافر وابتعد

أيام وأرجع قلت :زين
أبعتبر هذا وعد

قالت أخبرك ما تلين
أصبر ولك مني عهد

لأرجع ورد العهد دين
ونجدد أيام السعد

قلت الصبر للصابرين
والسبت يطويه الأحد

كانت همومي حاجتين
من عقبها زاد العدد

من سافرت زاد الحنين
والشوق للقمه صعد

من سافرت قلبي حزين
ناطر رجوع المبتعد

راحت وخلت كلمتين
حق الشماته يا سعد !!

© 2022 - موقع الشعر