الدله اللي غيثها بالفناجيل
تشوقني شوق الظنين لظنينه
فنجالها لاسيق وبهارها هيل
شرابها يعزم عزوم(ن) ضمينه
إليا عزم لطويق مارده الليل
يخايل القمه وباسه يعينه
كنه يشوف القمه بعين دربيل
وعزمه على المرقا ملا راحتينه
يحرم علي فنجالها يارياجيل
أن كان ما اذهلت العقول الذهينه
بتركيبت الفكره وبدع التماثيل
ونزف الهجوس اللي حباله رصينه
وبالخافق اللي تبترم به محاحيل
اللي يعزم الموت ساعة حنينه
ولاحن للعليا في اموري تساهيل
تبرى النفوس البايسات الحزينه
وفي الماقف الغصاب ياحط يا شيل
وكلن يدسم شاربه من يمينه
جملني الله كل ماساللي سيل
في ناظر اللي من ضما مرتوينه
ماجيت من ديرت هل السيف والخيل
من دار اخو نوره زبون السمينه
الا وانا عيني على الجدي وسهيل
والطايله تبقى لمثلي رهينه
وان كانها كبر الفضا والمخايل
مايظهر الرجال كود بيدينه
أبرك واشيل حمول موجان وشعيل
وأقوم قومت من جفته السكينه
وان عودت وقفه وصكت حلاحيل
لي لابت(ن) مجد العرب وارثينه
ربعي بني خالد سوات الهماليل
وقفاتهم تحي العروق الدفينه
وأمجادهم تشفي الكبود المغاليل
بيض الحباري بالحدب محتمينه
فالشعر أمثلهم وأشب القناديل
في شاعر المليون يامشاهدينه
وفي الشعر قسمي من خيار المحاصيل
أبهج وأداري خطر مدورينه
أترك خيال(ن) في يديه المحابيل
يشبك ويملأ بالمعاني خزينه
وأسبح واغيص بحور وأصب وأكيل
أسعى وأنقيلي نوادر ثمينه
نوادر(ن) لاعرضت للدواليل
تجذب كما نجر(ن) يجذاب دنينه
من شان تبقى في الليالي المقابيل
رمز(ن) تذريه الحصون الحصينه
والشاعر اللي يمت البيرق يخيل
يقرط على الشفه عقب صر عينه
يبغاه لكن دون شلف(ن) مصاقيل
من برمجت الأفكار بينه وبينه
وأن مالقى بين الحواجز مداخيل
مالله قسم يرقى مع مسلمينه
وأن قالها الله ياجموع المشاكيل
لأرسي مع الامواج مثل السفينه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر