بين الرياض وبين ديرة هوا البال

بين الرياض وبين ديرة هوا البال
مسافة لو هي قصيره طويله

في عين غيري كلها بضعة اميال
والا علي ياسعود والله ثقيله

تثقل على المشتاق في كل الاحوال
خص(ن) ليامنه تذكر خليله

لو المدا فالبعد ماهم لو طال
لو هو بعيد الدار والله لجي له

لوبيني وبينه متاهات واهوال
اطا الخطر لعيون شقرا الجديله

مير البلا ياسعود من دونها حال
يبو بدر حالت سلوم القبيله

اسلوم مامالت مع الوقت لومال
عوايد(ن) ماهي علينا دخيله

عوايد(ن) يحسب لها كل رجال
من قبل لايكسب لنفسه فشيله

عزي لمن حده زمانه على الجال
يلعبه الهاجوس في كل ليله

لانام ثلثين العرب جر موال
مافي يده غير المواويل حيله

ياوجد حالي لاطرالي على البال
وجد اليتيم الي فقد من يعيله

او وجد عود ماعطاه الله عيال
كبير سن ولالقى من يشيله

رمت به الاقدار في بحر الاهوال
عقب السعاده واليال الجميله

عليك ياللي مشغل بالي اشغال
يامشعل(ن) نار الغلا بالفتيله

يامحرق قلب الشقاوي بالاهمال
قلبه وكبده من سببكم عليله

ان كان طال الوقت ماجالنا وصال
قولوا له يكفن جنازة قتيله