الهنوف

الهنوف أم العيون السود... والشقر الذوايب
اطربتني باغنيات الحب.. والعشق.. ولحنها

صرت في لحظة أهيم برمشها النعسان.... ذايب
واتحرى صوتها... في كل ليله واحتضنها

عينها عين اشقرٍ في هدته... سوى الغرايب
صيدته في حزه المقناص... مال الموت عنها

كلها كتله حلا...مدري غلا...مدري مصايب
الوكاد اني صويب الحب... ذاك اليوم منها

كاملة بزينها... غطت على كل العجايب
مهرةٍ تاقف... على عرش العذارى في زمنها

يوم جتني بمشيها تختال... وجروحي عطايب
سوت اللي سوته فيني... وقمت اتبع ظعنها

يمها من دون رأي... قمت وشديت الركايب
جيتها في موعدٍ بالقرب... من سكة وطنها

قلت يابنت الحلال... الحب ماهو بالغصايب
قالت انت شلون تسرق قلب... من حٌبك فتنها

قلت انا مسكين غرتني... سواليف الحبايب
مادريت ان المحبه مهرةٍ... محد رسنها