(( النجــــم ))

ياللي نشدت العرب وين النجم من شهر
شفني كما نوض بارق لامع بنوته

وان هل مزنه مطر يكفيه طول الدهر
تروى به القاع والعربان من قوته

ادوي بصوتي لهم واقصد واغني جهر
يعجبك صوتي ليا من طال في دوته

واغرف من البحر ماني بغرف امن النهر
غامض ولا احد(ن) درى ويش الذي جوته

واللي على نجمه الخافت بكى مالقهر
انشده عن يده اليمنى وماسوته

تلقاه لامن بدا واجب عثر ماظهر
ويبور في رفقة الوافي وفي خوته

من يحسب انه على الصفحه ظهر واشتهر
ماودك الا بروس اقدامك تشوته

ياليل ياليل ياليل العنى والسهر
مالي بخبل الزمن هذا ولابوته

ان جيت مثل البعير اللي قوي الظهر
وان غبت فالواجب المعروف ما افوته