الـــــوقــــت - بخيتان اليامي

تبغى علومي؟ صب فنجان دله
من شأن شئٍ داخل الجوف ببديه

أصبحت مثل اللي مريضٍ بعله
ويرجي الرجاء في مكتشف من يداويه

ما أقدر أعيش ودنيتي وقت عمله
عملة ضعيف النفس دايم تخاويه

وألا الكريم الناس تعرف تدله
خايف يطيح ونبتر من ذراعيه

هذا زمانٍ ما عرفنا لحله
ياتيك في غفله وينشر بلاويه

أن جيت أبا أشكي قالوا انها مذله
من صاحبٍ قلب الشقاوي يناديه

وأن جيت أسلي خاطرٍ فوق مله
تلعب به الآهات والشوق حاديه

كل يقول الشعر في وصف خله
وأنا يابن منصور عجز الشعر فيه

مشكاي ودي يوم يلتم شمله
يشهد علي الله ماني بناسيه

لا جيت ابأنسى ماحصل منه كله
تشب نارٍ داخل الجوف تكويه

ماحد قدر ياخوك ياخذ محله
ليته درى ويحن للي معنيه

ودي أسطر له مع الخلق جمله
وأقول رأسي فوق ماأقدر أوطيه

رزقي على اللي كلنا تحت ظله
ربٍ كريم ما قطع رزق راجيه

© 2024 - موقع الشعر