نادي الأدب

نادى الأدب يا للي لحفظه حريصين
يشكى لكم سوء الأوضاع النكيده

نبي نزيل المُدعي يالمعدين
والسارق المارج نقصّر حديده

ونعالج الموضوع بالعُسر واللين
والماكر الخداع نقطع وريده

وناضع لدستور المثايل قوانين
حتى يتحقق للأدب ما يريده

ونحيي تراث البادية يا الفهيمين
من كل يم وكل قطر وبديده

ونمحي عن الساحة جميع الدخيلين
المدعين أهل القلوب البليده

أهل الدعاية بالصور والعناوين
طلاّبة الشهرة بنشر الجريده

اللي تظن إن كل من قال بيتين
يشهر ويطبع بالمطابع نشيده

وظلوا على حساب الأدب مستمرين
عالو عليه ولا بهم من يجيده

تفاخروا بإصدارهم للدواوين
كلٍ يباهي صاحبه في رصيده

لعب بهم تشجيع ناسٍ غشيمين
اللي يظنون (العصيدة) قصيده

لا شك نقّاد الأدب دورهم وين
ما ينظرونه بالأحوال الزهيده

يا هل ترى عن ذلك الوضع راضين
وإلا تحت حكم الظروف الشديده

وإلا مهم عن حالة الشعر دارين
كلٌ يحسّب مربحه والمزيده

وإذا الأدب صاروا جنوده غنيين
منه يقّدم نهضته يستعيده

قولوا لنا يا الفاهمين الحكيمين
ما رأيكم يا أهل العقول الرشيده

لا وين نرجى نهضة الشعر لا وين
نبي الإجابة والحلول المفيده