توك تجين ؟!

توك تجين تقدمين المعاذير
توك عرفتي قيمتي وإعتباري

توك بعد ما طاب كيفك مع الغير
توك تعيدين النظر بإختياري

توك تلومين الزمن والمقادير
توك تبين الوقت يرجع إجباري

توك تجيلي بعد ذيك المشاوير
توك تبين تشاركيني مساري

وينك من أول يوم أشوف التعازير
يوم أشتكي لك لوعتي وإنهياري

يومي على شوفك أسوق التباشير
وأفرح ليا جالك مع الناس طاري

يوم أخبرك عن حالتي بالتعابير
وإنتي ولا همك مزيد إنكساري

وهلحين يوم أقفت ليال المعاسير
وربي فرج كربي وعلأّ وقاري

وزانت حياتي بالهنا والتياسير
وبعد العنا والكود هديْت أفكاري

ولقيت اللي لي عندها كل تقدير
اللي على عهد المودة تداري

اللي غنتني عن جميع الغنادير
أفخربها وهي تفتخر بإفتخاري

هذا أنا هالحين شرحٍ وتفسير
عايش بقمة راحتي وإزدهاري

وهذي هي أنتي تجذبين التحاسير
وبعد التعالي تنثرين العباري

وش عاد لو عذرك معه ألف تبرير
ووشعاد لو دمعك على الخد جاري

فات الأوان وعل دربك مسافير
روحي وأنا تبقى الكرامة شعاري