بنت عجرم

لاضوَن الوضح والقلب مهبول...
قلت بسم الله وذبيت العقال

لولشوا ياأهل الكمنجه والطبول...
وإتركوني للثقيله والطوال

مالعج برقٍ على الجرد المحول...
ضاق صدر الليل ماهبت شمال

إلعبي يا ( بنت عجرم ) بالعقول...
وإرقصي دنياك ماتسوى ريال

ماصحى عصر الصحابه والرسول...
يوم أدار ( مسيلمه ) صابر ( بلال )

مدبره من جد لكن وش تقول...؟!
شينت الوقت إنه إليا مال مال

المصايب مستمره بالهطول...
والعيون إستبسلت والقلب سال

ماعرفنا ( العقل ) لو مابه ( خبول )...
وماحقرنا ( الذيخ ) لو مابه ( رجال )

وماعرفنا ( العرض ) لو مافيه ( طول )...
وماكرهنا ( الشين ) لو مابه ( جمال )

أدري إن ( القرم ) بالسودان ( زول )...
وأدري إن ( النذل ) نذل بكل حال

وأدري إن مافي يدي قوه وحول...
وإن شتمني من شتم ماأعطيه بال

مايضايقني ( ردي ) ولا ( عذول )...
ولاتسهرني ( هتون ) ولا ( نوال )

لو يطول الدرب وإلا مايطول...
ماتهزك ريح ياصم الجبال

بين ( شلف الوقت ) و ( ثقال الحمول )...
شلت شيٍ والله إنه مايشال

لاسقاك الله يا ( باب الفضول )...
العرب قامت تحاذف ( بالنعال )

قالوا إن ( الكحل ) عمَك يا ( الكحول )...
والوكاد السالفه فيها هبال

( ياآبن أُم ) إن كان شفت إني زعول...
غض شرهاتك ترى همومي ثقال

( ياآبن أُم ) أرجوك أنا مابي ( حلول )...
خلني رهن ( الأماني والخيال )

لامكان ولازمان ولافصول...
دون ربع ودون قوووم ودون مال

ماضحكت إلا على ( سخف العقول )...
ولا بكيت إلا على ( موووت الرجال )

شعر: عبدالله الدواس