الكفو أدسم شاربه والنذل يبطي ويخسى...
واللي مهو قد العلوم الكايده يرجع وراه

بعض المواقف ماتبي ياعل يمكن ياعسى...
واللي يصوت ينتظر ( لبيه ) ماهو بس ( هاه )

الله يازين ( القسى ) ياذيب رغم إنه ( قسى )...
لكن يبيّن صاحبك ويبين طيبه من رداه

إهب يا ( وجه الردي ) وإهب يا ( كيد النسا )...
والله يرجع ماغدى وإن مارجع يقلع مداه

ياقلب وإن ضاقت عليك الصبح تفرج بالمسا...
ذا مبداء اللي مانسى ربه وربه مانساه

ياللي تجون من ( الحسا ) وش صار ( بعيون الحسا ) ؟!...
وياللي تجون من ( الحرم ) وش صار في ( سمر الجباه ) !؟

نكبر وننسى والبلا من شي صعبٍ ينسى...
والشمس تقبل وتغدي و ( الصبر ) يبلغ منتهاه

والضيق لامنّه تربع في ضلوعي وإحتسى...
فنجال صبري كيف مشهق ( آه ) وأزفر ( آه آه )

والقلب من جرف ( الوهن ) دحدر على ( درك ) الأسى...
وأنا أصوت وأعتزي وأصرخ ولاكن ( لاحياه )

ياجعل حظٍ مارسى له كم / إلا منه رسى...
يرسي على ( الجودي ) ويبرد حرّتي / وإلا عساه

يعني إذا ( مافيه أمل ) والحزن طول وإكتسى...
قلبي / عسى يصبر علي الموت لين أكتب وصاه

الصبح طولها معي من جد ( تكفى ) يالمسا...
إخفض جناحك يابعد راسي ترى مالي غناه

مليت من ( غدر الخوي ) طفشت من ( كيد النسا )...
وإلا ( النذل ) لو قال أنا وأنا ترى عندي دواه

أما ( الكفو ) قله ( كفو ) لاصار في وقت القسى...
إن ماتقدّم وإحتزمّ / يعجبك مايرجع وراه


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر