غرور المشاهير - عيد الرشيدي

توك تجيني تعتذر خير ياطير
(من باعنا برخيص بتراب بعناه)

لاتعتذر ماللجفا اي تفسير
غير ان غيري في حياتك تمناه

ماللرسايل في غيابك معاذير
وفر رصيدك واشطب الرقم وانساه

لأني بعد حبيت من باب تغيير
غرون شلع صمام قلبي من اقصاه

والحين حبه فاق كل المعايير
مالك مكان بداخل القلب وياه

هو المعزب والاهل والمسايير
مر الخفوق وخرب اللي بنيناه

ماللخطاوي في حضوره مشاوير
كن الخطاوي حالفه ماتعداه

يقول يامر يطلب الشيئ ويصير
كل المشاعر ودها تكسب رضاه

مزيون متعلم وهو توه صغير
يازن بلد في مستواه ومزاياه

مغرور ماخذ من غرور المشاهير
لاشافني قام التواضع وغطاه

والاانت ياغصني جفوك العصافير
طيع الزمان وحب خشمه ويمناه

لاتعتذر ماللمعاذير تبرير
لاصارت بنود المراسيل ملغاه

انا عرفت من الحياه التغايير
لين اقتنعت ان السعاده معاناه

اشوف بوجيه الليالي تعابير
واصد عن وجه الحزن واتحاشاه

واشوف ريضان الاماني نواوير
واقف على حد الرجا واتخطاه

اغير واصل سور الأحلام واغير
واصل محطات الأمل واتلقاه

وادخل دهاليز المتاهات واسير
والد راسي للعنا واتقفاه

اسوق رجلي للتباشير وتحير
كن الشقا مخلوق في يوم وياه

واليوم انا سديت باب المعاصير
بابن يجيب الريح ماطيق طرياه

لاتعتذر ماللرسايل معاذير
وفر رصيدك واشطب الرقم وانساه

© 2024 - موقع الشعر