(( جـــيــــــتــكــ )) - عيد الرشيدي

جيتك وانا كلي عتاب ومشاريه
ليتك تقدر جيتي يوم جيتك

جيتك ارتل في قصيدي واغنيه
رغم المفارق والجفا مانسيتك

جيتك حزن شاعر زمانه غدر فيه
عاف القصايد وانحنى عند بيتك

جيتك من الضيقه عقب رحلة التيه
ليتك تحس بلوعة الشوق ليتك

مابيك مثل اول كلامي تلبيه
ولابيك تعطيني كثر ماعطيتك

ابيك لامني طلبتك تقول ايه
عطني على قدي وخذني فديتك

وابيك ياقلبي خفوقي تداريه
وابيك دايم في خفوقي مبيتك

وابيك لاجار الزمان بلياليه
واحتجت لك في عز ضيقي لقيتك

مالعن من احساس الجفا غير طاريه
وماروع من احساس القاء غير صيتك

احرص على الموعد واحسب واحاتيه
والموت لاطاف الوعد واحتريتك

اشتاق واجهم درب الاشواق واسريه
وارتاح لاطال الغياب ونصيتك

تبي تعرف الحب وشلون راعيه!
شف حالتي واحكم بعد ماهويتك

وتبي تعرف شلون حبك اداريه!!
شفني كسرت بكبريائي وجيتك

جيتك وانا كلي عتاب ومشاريه
ولاوقفت الا على باب بيتك

© 2024 - موقع الشعر