يابوي وينك؟

لـ ، ، في غير مُحدد

يابوي وينك عذبتني الليالي ؟؟
ليتك تشوف الحال وشلون منصاب

ليتك تشوف الهم وأوضاع حالي
ليتك تشوف الدمع وشلون سكاب

ليتك تشوف اللي بعدكم جرالي
حتى الفرح يابوي وياك قد غاب

أمشي و أنا يابوي همي ظلالي
وأخفيت جرحٍ يايبه مابعد طاب

جرحن مع الايام لامن طرالي
سالت دموع العين من بين الاهداب

ساعة رحيلك يابعد كل غالي
انهار حلمي وانكسر قلب معطاب

خاوتني الحسره وحزني غدالي
اوفا صديقن لي من دون الاصحاب

واوفت لي العبره وضيقي وفالي
وعايشتهم يابوي في ديرة أغراب

يابوي شفت الويل وانا لحالي
تركتني للوقت ولضيم الاقراب

العيش دونك والزمن ماهنالي
موحش بدونك يابعد كل الاحباب

واجهت انا الدنيا بكل أحتمالي
أسد باب وتنفتح بعده أبواب

أعيش في حزني وهمّ ارتحالي
أشيل حمل جبال يابوي وهضاب

مالي عضيدٍ في حياتي موالي
أنخاه لاضاقت معي كل الأسباب

آخذ برايه لا تسكر مجالي
وفيه أعتزي كان الزمن كشر الناب

مالي سند غيرك ولا لي ولا لي
غيره سواء المعبود هو رب الارباب

أرجيه سبحانه عظيم الجلالي
يرحمك ياعرب السلاله واالأنساب

وينزل على قبرك حقوق الخيالي
ويجعل عليه الخير والوبل ينساب

ويجعل مقامك في جنانٍ معالي
وينجيك من شر الهوايل والاصعاب


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر