رقــــــــــم جـــــــــــــــــــوالي

في داعة الله بمان الله يالغالي
ودعتك الله وكان الله في عونك

رح لك لحالك ونا باروح في حالي
حتى ولو دنيتي لاشي من دونك

عظَّمني الصبر في حلَّي وترحالي
قتيلك ان مت ون ما مت مجنونك

جددت جرحي وعاد الجرح ما دالي
ولا افتكر لي هدف عذرك ومضمونك

لابل صدفه لقيتك واقف اقبالي
اسرت قلبي وصار القلب مفتونك

عذبت قلبي وتتلذذ بغربالي
غربلت قلبي وعذبته على هونك

اسهر مع الشوق ونته خاطرك سالي
يازين ما خفت من ربك بمضنونك

احرق هداياي ومسح رقم جوالي
لا تتصل بالغلط وتزود طعونك

احذف عنوايني امسح باقي اقوالي
إلا القصايد امانه لونهن لونك

امنتك الله ترعاهن بلسبالي
خزَّنتهن يا حبيبي داخل عيونك

يالله عسى انك تلاقي الَّي على بالي
من عين تضحك ومن لخرى يبكونك

منهم تلاقي العذاب انواع وشكالي
من شان تذكر حواسي كيف يغلونك

لا من تذكرتني فذكر تبهذالي
وسأل على ابيات شعري با يدلونك

في حين ما عاد باينفع تفدالي
ونا الذي كنت اقول الغير يفدونك

ودعتك الله بمان العادل الوالي
عسى تلاقي بدالي من يحبونك