من قطرات دمي.. - راشد اليافعي

كلما تذكرت الهوى كلما تذكرتك أكيد
وشلون اعيش مع الهوى من دون ما أذكر هواك

إذا نسيتك أشعر ان الشوق لعيونك يزيد
واذا ذكرتك أشعر ان الشوق ما عمره نساك

لا ما أفكر لو نسيتك كيف ألاقي لك نديد
لكن أفكر كيف أخلى عيشتي دايم معاك

تصدقين ان الوله حتى بأبيات القصيد
أسمع صداها يوم نادتني تبي أكتب حلاك

واذا كتبت الشعر يوم اوصل إلى البيت الجديد
أشعر بان البيت لي عداه ما يوفي غلاك

من كثرة احساسي بأن الشعر في حقك زهيد
بديت أشك بغيرة الابيات لو شعري طراك

حتى مع حبر القلم أحس خطه ما يفيد
كنه الى مني طريتك صاب خطه إرتباك

تالي كتبت الشعر من قطرات دمي والوريد
عشان لو صادف جنابك ما يصيب الا رضاك

© 2024 - موقع الشعر