دنياك ..!

دنياك رحْله تَحْمل اسرار تنْقال
واسْرار تبْقى بالضمير امْحفوره

والطفْل يَكْبر.. لين تلْقاه رجّال
بين الرجا واللياس يرضي غروره

وتْصادفه شغْلات ما هي على البال
تَقْلب موازين الحياة الصبوره

والحلم في راسه له ألوان واشكال
يرْجي شعاع الصبْح يشْرق بنوره

والرزق قسْْمة خير علاّم الاحوال
سبحان ربي يغْلب العَدْل جوره

والمقْتنع مرتاح منْ حال لحال
في قسمة المعبود يبْدي سروره

طَبْع الطمع يعْمي خبيثين الاعمال
عن حاجة المحْتاج وقْت الضروره

والجَهْل طعْنة رِمْح في ظَهْر عقّال
سبة هبيلٍ ضيّع ابليس شوره

والعقل يلْقى له من العرف منْزال
لا طاب فاله والديار امْعموره

ما يسلم المسلم تجافيه الا نْذال
نفسه على سمعة حياته غيوره

والعين تَعْشق زول من بد الازوال
قلبه تعلق في هواه وشعوره

وان مال حظه فيه والحب غرْبال
درب الشقا غَصْب المولع يزوره

والذكريات اتعيد له بثْ الارسال
والفكْر يَرْسم له من الشوق صوره

والوقت يَرْكض رَكْضة حْصان خيّال
يطوي سجله عند ساعة حضوره

والشيب دمْعة حزْن والدمع لاسال
يحسْ في صدره مرارة حروره

يَذْكر شباب العمر نازل ورحّال
ويقول ليت الشيب ما حلْ دوره

والموت ما تَشْريه بالجِهْدِ والمال
نهاية الرحله شواهد قبوره