تثبت الايام

لا تردي صار قلبك من حجر
يرحم الله عشرة الحب الكبير

تثبت الايام من فينا خسر
والندم مايبري الجرح الخطير

من جرحتي خافقي وقت السفر
خاب ظني قبل تحديد المصير

ما يبيع الود من قلبه عمر
بالوفا لوحدة الظرف العسير

العناد اللي تخفينه ظهر
والتحدي طبع بالعقل الصغير

ضاع طيب النفس في حبك هدر
كم عطيت الحب من قلب كثير

كم قطفت الورد من غصن الزهر
يطرب المشتاق لا فاح العبير

باقي الذكرى على شط النهر
ودها عن فكري العابس تطير

ما بقالك شي من حكم القدر
الغلا مكتوب له عمر(ن) قصير

الحظيظ اللي على الشده صبر
واثق الخطوات في دربه يسير

المولع من يلومه لا سهر
وان تصبر عاش بالدنيا بخير

العذول اللي يموت امن القهر
ما يلاقي له على الطيب نصير

يا عروس (ن) ترتجي رد الخبر
بلغوها لازم الفرقا تصير

شجرة الصفصاف ما تعطي ثمر
مثل نور الشمس ما فادر الضرير

في جفانا لا تعيدين النظر
ما يطير الطير واجناحه كسير

جربي غيري كثيرين البشر
تعرفين القطن من سلك الحرير

فرق ما بين الثريا والقمر
لا حكمتي بالعداله والضمير

ما يجيب الدانه اللي بالبحر
غير غيص غاص بالجم الغزير

من خطانا نأخذ دروس وعبر
والقناعه كنز للعقل البصير