النسب

تسمعوا للهرج باول مقاله
هرجٍ وكاد وبه معانيٍ كثيره

عندي لكم يا مدورين الشكاله
نصيحةٍ تهدى عليكم بريره

حاذور بنت اللاش لوضى جماله
بنصحك قرب اللاش ما منه خيره

ما ينطلق وجهك ليا جا مجاله
وابنك يحوش باثر ابيها معيره

عليك باللي ساسها ينعنا له
بنت الشجاع اللي يمينه شطيره

سهل الجناب ومتعباتٍ دلاله
وان عسمت ينطح شباة المغيره

وسيع حلم وماشيٍ بالعداله
بين الجماعه ما يجر الجريره

ياتي ولدها متعبينه خواله
ماهوب مثبورٍ يمينه قصيره

ومن جوز الخايب علشان ماله
يصبح نديم الراي يلعن مشيره

لاتجوز اللي ساس رايه رزاله
يصبح على شوفتك منه كسيره

دايم عليها كاثراتٍ عذاله
قنن دواديه عليها كثيره

تفرح ليا دبر وتكره اقباله
من كثر ما يثغي عليها العثيره

وتلعن صديقٍ فيه شربك احباله
لاحوشت خيرٍ ولا من ستيره