الموجز

إليا انكسر إنسان بالله قلّه
قله يبان العود عند اشتعاله

والثاوي اللي كل هم (ن) يدله
عليه من كثرالمصايب دلاله

ولّ يازمان فيه مليون خلة
حتى الخوي ماعاد تاصل حباله

ماقلتها لعبن وعندي أدلة
ياصاحبي هالوقت بان اختلاله

الدنيا هذي لو تجي لك مطّلة
فيها السعد ياخوي عجلن زواله

فيها الفقير منظام محدن فطن له
مرعوب حتى مايداني ظلاله

والطيب اللي كل طيّب يدله
عقب المعزة باع أثمن دلاله

والوادي اللي كل غيمن يبلّه
أرضه صباخ ولا ارتوت من زلاله

والفارس اللي هدّ سيفه وحلّه
شرى السلامة يوم خانوا رجاله

خلوه وحده فالليالي المذلة
مسكين ثابت في المواجه لحاله

وبعض الوجيه الضاحكة المسفهلة
اللي تجي لك كل يوم بحالة

نقالة للهرج من دون ملّة
متنعمة بين الغدر والظلالة

والهايم اللي في ضلوعي محلة
ماغير أدوج في مداهل خياله

والغيمةاللي من عيوني مهلّه
هتّانها ياخوي يرزم خياله

والموجز اللي جيت عندك أهله
شئ بسيط من احتضار العدالة

اليا انكسر إنسان ياهوووه قل له
قله يطيح العود لا نهد جاله