ليل الشتا يامطوله وانا بعد صبري طويل
صبري ليا ماله مدى والليل ينهيه الفجر
بعض الهجوس تسرمد الفكره ولاتشفي غليل
ماكنها الا بذرتن تسقا ولا فيها ثمر
وانا هجوسي تضرب الفكره مثل حد الصقيل
فيها اتنومس وانثني لطرق ويزين السهر
ياراكب الي كنها البراق في عرض المخيل
اليا استعت تطوي الاميال في لمح البصر
حربيتن كن حسها صوت العزاوي والصهيل
لا لجلجت بين الغيوم الي تبشر فالمطر
قم يانديبي فوقها منصاك مزبان الدخيل
الشاعر الي ذاع صيته فالجبيل وفالخبر
سلم عليه وقل يابندر صاحبك راسه عليل
عجزت تداويه الاطبه فالمغذي والأبر
اعماسي راسي مايطيب الا بطاروقن جزيل
من راس شغموم يعرف العلم ويغوص البحر
البارحه والدله الي بهرت فالزنجبيل
الي مسويها عرضها للبوادي والحضر
طالت يميني وقصرت يمنا الذليل ابن الذليل
شربت فنجال اطلق الاشناب وانا ابن أجعفر
يالين صرت الشاعر الي لايميل ولايعيل
ادرج الخطوه على كيفي ولاكن في حذر
من بعد مابار العميل الي هقيت انه عميل
شخصن تمزهلي قبل شهرين ويدق الصدر
ياقوم يالي ترتجي مده من كفوف البخيل
غلطه وصارت درس للايام والدنيا عبر
مشوار الاميال الطويله يبتدي في ربع ميل
وانا علي مبطي نذر والحين جا حل النذر
لعيون من خيالها في عين عبدالله نزيل
من وين مالديت وجهي شفتها مثل القمر
ام العيون الناعسات الخرس والرمش الظليل
ام النحر وام الصدر وام الجدايل والخصر
ام ايش؟ام الزين كله الجمال المستحيل
الي خذت من ورده الجوري ومن نور البدر
والله لو اكتب قصيده كل صبح وكل ليل
واغني اجمل ماعرفه الشعر من وصف وصور
انه بحق المهره الي تسكن بقلبي قليل
فديت قلب الي تعومس كل ماحان السفر
ماطيع فيها عاذل ولاا غيرها بلقا بديل
لايابعد قصه قطر والي حصلي في قطر
العشق لامنه تملك قلب رجالن ثقيل
عمره تعدى السته وعشرين وقليبه خضر
معاد دور للحبيب الي سكن قلبه بديل
وجه نظر واكيد كلن له بعد وجه نظر
وان كاني مرويت من يسمع قصيدي بالجزيل
علم هنوفن عاشقتني بن شاعرها خسر
هاذي علومي ياجعل عمرك يابو ثامر طويل
واليا وصلك الصوت مالك لا مصد ولاعذر
عطيتك المعنى مغطا وانت عراف ودليل
برق بقفله عجز قيفاني وبرق فالصدر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين