الأميـــر الــوالـــــد

الحزن جمع جيوشه على الدار وحشد
وانطلق يوم الثلاثاء وعلى كل الكويت

جات له فرصه وسيطر على شعب وبلد
اشهد انك يالحزن ليله فراقه غزيت

ما دخلت إلا وعامد على فرقا سعد
تدري ان الشعب ما عاد يهناله مبيت

وما دخلت ألا وتدري ان ما تلقى ضدد
والدليل انك على كل هالارض احتويت

يا عسى الله يمنحك رحمته يابوفهد
انت مداتك وفا وانت تعطي ما خذيت

وانت راسك راس مالغير وجه الله سجد
وانت كل عمرك بدايات عمرك ما انتهيت

موقفك ما يشبه إلا مواقيف الاسد
ما خبرت انك عن الموقف الصلف انتحيت

ما خبرت إلا انك حزام للدار وسند
ان زعلت الكل يزعل ويرضى لا رضيت

سيرتك منهج ثقافي على العالم ورد
دونه تاريخنا نهج مثله ما قريت

العطا مازال بك وانت في وسط اللحد
خطتك رسمتها للمقابيل ومشيت

من يمينك عاشت الدار في خير ورغد
يالأمير الوالد الحر كفيت وفيت

ما يجيبن امهات الكحل مثلك ولد
يا مدور مثل شيخ المراجل مالقيت

البقى من بعد ربي براسك يا فهد
والفعل يبقى لراعيه لو راعيه ميت