صمت المشاعر - جديع الملعبي

البارحة طاح دمع وضاق رجال
وارتاح عاذل وراحت غشمريه

راحت تجر الخطاوي بين الاميال
والبعد يزميبها شويه شويه

ودعت كلمة هلا ياطيب الفال
وجفني حضن دمعة العين الشقيه

يا صدر والله ما راحت من اهمال
جودتها بس طاحت من ايديه

جيت انحني لك واجدد بعض الامال
لاكنها عيت اسلومي عليه

البدو ما يسمحون بربع مثقال
ل اللي يهين السلوم الاوليه

وانا بدوي فكر ماني ابدوي حال
لو اتهموني بداء العنصريه

ماني مغني علي يامال يا مال
بهيجن اللحن لارضى السامريه

الشك موجود بس ان الغلا زال
اكسب شموخي وتفقدني بنيه

ياهيه يا للي رحلتي كيف الاحوال
عقب المفارق عسى العيشه هنيه

هل شق صمت المشاعر صوت موال
من شعر قيس لفراق العامريه

يالجادل اللي عليك القلب قد مال
ذقني عروقه ونمتي تحت فيه

واجزل عليك العطا بالحال والمال
واغناك حتى جزمتي انك غنيه

كانت عيوني سفر ورموشي ظلال
وانتي الحلا والدفا والنرجسيه

فرقاك ما كان تطريلي على بال
ياكبرها من مصيبه سرمديه

كني مفارق وطن واحباب واموال
ضامي وجايع وضارب مهمهيه

فرقى الحبايب تسم نفوس الاطفال
ما فيه نفس «ن» على الفرقا قويه

نعم فقدتي قصيد... وظل رجال
وانا فقدت... الضلوع المخمليه

احول.. وش هالزمان اللي به الحال
ينقص وينقص ولا لي مقدريه

كسبت بكره وماتن سبعة اجمال
ربحت ميه وراحت تسع ميه

لو قلت بنساك فالذكرى على البال
ذكراك حيه ما دام النفس حيه

يا حال: ما تثبت الدنيا على حال
يالله... تجعل خواتمها زكيه

© 2024 - موقع الشعر