الطب ما سر القلوب الجريحة

ذنبك على جنبك ولالي شغل فيك
مادام منت بتستمع للنصيحه

كل ما نصحتك تحسبني معاديك
وأنا أشوف انياب حولك كليحه

قال المثل خلك مع اللي يبكيك
من يضحكك دوّر عليك الفضيحه

ما كل دكتورٍ علاجه يداويك
الطب ما سر القلوب الجريحه

ما بيك كنك في زمان المماليك
مملوك لحساب الوجيه القبيحه

لا طحت ما تلقى ذراعٍ توقّيك
مكثر سكاكين الجمل في مطيحه

تلقى البلاوي والغثا من حواليك
شريحةٍ تقطع وتاكل شريحه

حامي بحامي للفتن والشرابيك
الأصحاح ولا فيها نوايٍ صحيحه

خلك مع اللي ما يخاوي مخابيك
يهب ريحك كل ما هب ريحه

لا مد لك ما يرتجي مدتّ ايديك
كريم ماكفّه بكفٍ شحيحه

اسمع كلام اللي يعزّك ويغليك
»حجلان« ما هم الذيابه نبيحه

كانك على ظني فنالي شغل فيك
ابنصحك واكثر عليك النصيحه

والله كان الله.. يا فلان يرضيك
لولاك غالي ما تهيض القريحه