الجوهــــــــــــرة - راشد الرياحي

زدني من الدله وبعّدني عن الهرج الدقاق
السلعه الهزله لك الله ما التفت في سوقها

شاعر واحب الشعر واطربله ولا احب النفاق
وتقنعني الجزله ليا مني سمعت طروقها

ولا شيب رموشي يا غالب غير نقض الاتفاق
سنين وعيوني يا غالب ما تجف رموقها

العود الازرق ريحته ناتج وجود الاحتراق
وادنى طموحاتي قدم وجهي تلوح بروقها

حاولت أوطّن فكرتي في داخل حدود النطاق
أما يظلل ظلها والا تسوق عروقها

مع زحمة الايام .كني والهقاوي في سباق
حرمت نفسي لاجل غيري من جميع حقوقها

حمّل الجمال يطاق . وحمول النشاما ما تطاق
وجدّي .وابوي ونعم . والنعمين عيب ابوقها

وليس من . هذا أنني اعيش عصر الانغلاق
المتذوق رغبته وشلون الامس ذوقها

تلعبنا الأهواء مثل التحالف فالعراق
والجوهره ما يعرف اللاعب رقم صندوقها

يا غالب . أعذرني يساق . اللي منوّل ما يساق
وليت العطاشى الماء بعد هذا يبلّ عروقها

من طاح في مره من المرات هاب الانزلاق
ومن يعرف يشقّ العبي يعرف يخيط فتوقها

لو . أخفي الاحزان وهموم التلاقي والفراق
بقعاء على وجه الشقي لازم تبين طقوقها

اشره : على الغالي وشرهاتي لها وزن . ومذاق
ما به يدين : الا يدين الله تعالى . فوقها

وحل الأمور وربطها في يدك يالترف الرّقاق
يا شبه صفراً سرجها يلعب على سمّحوقها

أدخل على الله ثم عليك . من الغلا والاشتياق
ترقد عباد الله ورجلي للهلاك أسوقها

من ذاق طعّم التضحية في لهفة قيود العناق
طاوع هواه . ورغبته كسّر سلاسل شوقها

يا بنت . من حب السعه ما حب جوّ الاختناق
تضحك هلّ النمة وتلّوي بالكلام شدوقها

وأنا بصبيان البقوم أقدم ولا احب النفاق
وتقنعني الجزله ليا مني سمعت طروقها

ويستاهل المقلاط والفنجال مفّتك النياق
لا غطّرفت بنت الشيوخ لمن يرجع نوقها

راشد الرياحي
© 2022 - موقع الشعر