الزيت ياصاحبي من دون تكريره
يشيل في داخله اصناف وقياسي
وحنا بشر من كبير القوم لصغيره
منا من يطيح ومنا اللي جبل راسي
ياشينها لا طلبك الحر تحريره
طاح بدغاليس دنيآ طبعها قاسي
العلم واضح لنا ومكسور تشفيره
اما تطاوع هواي او ذوق من كاسي
لا صار ماينفع العداد تصفيره
خلاص انا منه راضي اعلن افلاسي
والجرح يلزمك يادكتور تطهيره
من قبل ماتكتب الوصفه بقرطاسي
ياليت ينفع واقول دواه تخديره
يمكن يجيز العذر لو قيل له ناسي
وانا علشان نفسي تكرم الديره
امشي على الدين وارفع بالنسب راسي
والا انت ياصاحبي ياطيب السيره
يفوق وصفك قصيد(ن)عانق احساسي
ماانته من اللي يمد لضيفه البيره
ولا انته من اللي يصك الباب محتاسي
من روس قوم(ن)خذوا بالعلم تفكيره
والروس من فوق والاقدام تنداسي
تستاهل الطيب ياذيبه وياطيره
ياللي تحوف المراجل دوم عساسي
ياجعل من حاكلك بالشر تدبيره
يبلاه ربي مرض ويذوق ويقاسي
اقولها والحراره يلعب امبيره
لا عودت للعلوم العرق دساسي
الله يجيب الوكاد ويبعد الحيره
ويرتاح قلب(ن)تعب من كثر هوجاسي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين