مرثية في اخي وابن عمي رحمهم الله

كلٍ بعيده تهنى بين خلانه
وانا تمركز بقلبي همٍ اشقاني

همِ تفجر بوسط القلب بركانه
هز المشاعر وعذبني وبكاني

لاشك اخفي هموم القلب واحزانه
من خوف لاتدري بما في عدواني

اضحك مع الي ضحك والنفس مرضانه
ماغير اجامل حشا ماني بطرباني

والعين من دمعها الخدين غرقانه
تبكي على الي لهم بالقلب مسكاني

ابكي عليهم ولاعيني بخوانه
ياعل من لامني يجيه ماجاني

ثنينٍ توفوا لهم في مهجتي خانه
ياعزتي لي متى بشوفهم ثاني

فرقى طويله مابين الاخو واخوانه
من بعدهم عايشٍ تقول وحداني

امزح واجامل مع ابن فلان وفلانه
وانا اونس النار وسط القلب تصلاني

عمر الفتى ينقضي لو طالت ازمانه
لابد مايرحل ولو كان من كاني

يالله عسى ارواحهم بالخلد سكانه
وترحمهم برحمتك ياعز رحماني

واتصبر قلوبٍ من الهم حرقانه
كن يتوقد بها من الهم نيراني

وصلاة ربي عدد ماهلت امزانه
واعداد ماغرد القمري بالاغصاني

على نبيٍ بعثه الله سبحانه
هدايةٍ للبشر في تال الازماني